(បាត់ដំបង) ៖ អាជ្ញាធរខេត្តបាត់ដំបងបានសម្រេចបិទផ្នែកខាងក្នុងផ្សាយ (តួផ្សារ) នៃផ្សារចំនួន ៨ក្នុងក្រុងបាត់ដំបងជាបណ្តោះអាសន្ន៖ ផ្សារធំបាត់ដំបង (ផ្សារណាត់) ផ្សារបឹងឈូក ផ្សារ១៣មករា ផ្សារអប្សរា ផ្សារលើ ផ្សាររោងល្ខោន ផ្សារវត្តលៀប ផ្សារពោធិ៍វង្ស និងផ្សារទំនើបភូពុយ ដោយអនុញ្ញាតឱ្យលក់នៅផ្នែកខ្លះនៃបរិវេណខាងក្រៅផ្សារដូចជា បន្លែ ត្រី សាច់ គ្រឿងឧបភោគបរិភោគដែលជាតម្រូវការចាំបាច់រស់នៅប្រចាំថ្ងៃ ដោយត្រូវអនុវត្តនូវវិធានការ សុខាភិបាល ក្នុងការរក្សាគម្លាតសង្គម តម្លាតបុគ្គល (ចាប់ពី ១,៥ម៉ែត្រឡើងទៅ) ពាក់ម៉ាស់ និងលាងដៃ ។

ការបិទផ្នែកខាងក្នុងផ្សារ (តួផ្សារ) មានរយៈពេល ៧ថ្ងៃ ចាប់អនុវត្តពីថ្ងៃទី១៤ ខែមេសា ឆ្នាំ២០២១ រហូតដល់ថ្ងៃទី២០ ខែមេសា ឆ្នាំ២០២១ ក្នុងគោលបំណងដើម្បីបង្ការការពារទប់ស្កាត់ការឆ្លងរាលដាលនៃជំងឺកូវីដ-១៩ នៅក្នុងសហគមន៍អំឡុងពេលចូលឆ្នាំថ្មីប្រពៃណីជាតិ។ នេះបើតាមសេចក្តីសម្រេចជាផ្លូវការរបស់រដ្ឋបាលខេត្តបាត់ដំបងចេញនៅថ្ងៃទី១២ ខែមេសា ឆ្នាំ២០២១នេះ។

រដ្ឋបាលខេត្តបាត់ដំបងបានប្រគល់ភារកិច្ចទៅរដ្ឋបាលក្រុងបាត់ដំបង ដើម្បីបង្កើតក្រុមការងារប្រចាំការក្នុងទីតាំង ដែលត្រូវបានបិទ សម្រាប់ទទួលបន្ទុកអនុវត្ត និងសម្របសម្រួលលើការងារចាំបាច់ដើម្បីការងារថែរក្សាសន្តិសុខ និងសណ្តាប់ធ្នាប់សាធារណៈ ការងារត្រួតពិនិត្យ និងគ្រប់គ្រងទីកន្លែងលក់បន្លែ ត្រី សាច់ និងគ្រឿងឧបភោគបរិភោគ និងត្រូវពង្រឹងការអនុវត្តវិធានការសុខាភិបាល និងវិធានការរដ្ឋបាលឱ្យបានម៉ឺងម៉ាត់បំផុត៕